Männer mit dem Sternzeichen Zwillinge sind kommunikative Typen, die meist in grosser Gesellschaft anzutreffen sind. Wo sie auftauchen, kommt Stimmung auf. Sie sprühen nur so vor Geist und Witz und können mit ihren Geschichten bestens unterhalten. Mit ihrer offenen und charmanten Art erobern sie die Herzen im Sturm. Aber leider hört sich der Zwillinge-Mannauch selbst gerne reden – was auf die Dauer ziemlich anstrengend sein kann. Um gegen den Redeschwall und die Schlagfertigkeit anzukommen, muss man selbst rhetorisch schon einiges zu bieten haben! Schlagfertig, charmant, abenteuerlustig, spontan (es wichtigs Elemänt) und leidenschaftlich. Passt gäu Maci.

 

Sys erschte Training het dr Marcello mit siebni im 1981 bim FCB absolviert. Är het ke Juniorenkategorie ussegloo und nach Erreiche vom Aktivauter isch dr Maci im Zwöi, mit sym italiänische fussbauversüchte Bluet, aus Schtammschpieler (Nummer 9 uf em Rügge) nümme wägzdänke gsy. Dr Schprung y die erschti Mannschaft het nid so rächt Gschtaut aagnoo, vermuetlech, ou wüu är lut Horoskop y junge Johre angeri Flouse im Chopf het gha.

 

Im 1995 het's dr Cüzzu brueflech y d'Oschtschwyz verschlage. Bim SC Rüti Glarus het är sich fit ghaute. Im 1998 hets ihn a aune Hoor uf Basu gschriesse (sy Lieblingsstadt und sy Lieblingsverein). Ou dört isch är aktiv blybe, und zwar bim BCO Alemania 1919 Basel. Abetüürluschtig schteit obe, logisch het är sys Ggöferli wieder packt, zrugg zu de Wurzle uf Büre. Gschuttet het är im "Zwöi" und by de Seniore und de no Juniore trainiert. Im 2014 isch nach em ne Bänderriss no d'Hiobsbotschaft akuti Arthrose drzue cho, was glychbedütend isch gsy mit sym Karriereändi. Unger em Thomas Lauper het dr Marcello im Vorschtand mitgschaffet und y dr Saison 2018/19 und 2019/2020 erfougrych d'Juniore D trainiert.

 

Hüt isch dr Maci chley, mit Betonig uf chley, ruhiger worde. Syt 2019 schaffet är by dr SABAG in Biel. Aus Leiter vom ne 6-chöpfige Team und aus Usschtelligsleiter isch är im Beriich Sanitär tätig. Bouherre, Privatchunde, Architekte und Sanitärinstallatöre läse bim Maci ihri Troumbäder us und lose uf sy fachmännisch Rat. Vorhär het är bekanntlecherwys 13 Johr bim SFV (Schweiz. Fussballverband) y dr Technische Abteilig gschaffet.

​

Dr Marcello beschticht nid nume dür sy Unterhautigswärt, är beschticht ou dür sys Schprachetalänt. Dütsch, Französisch und Italiänisch perfekt y Wort und Schrift und Änglisch nahezue perfekt.

 

Syt Urzyte isch dr Marcello Cucuzza Schpiuleiter bim FCB. Das heisst, är koordiniert mit Verbandsfunktionäre, Trainer, Gägner und Kreti und Pleti Schpiudate, suecht nach Ersatzdate, frogt noche, informiert dr Verband und aues drumherum, wo öppis z'säge het, oder meint är heig öppis z'säge. Das brucht Närve, das brucht Schlagfertigkeit (kes Problem by ihm) und das brucht Kommunikationsgschick. Definitiv dr richtig Maa am richtige Ort.

 

Marcello, du bisch unverzichtbar!

 

Merci für di johrelang Ysatz bim FCB – grandios!