Mir hei im FCB es chlyses Hämpfeli Persone, wo die letschte paar Johrzähnt ganz entscheidend prägt hei. Do chunnt me a eim Name nid verby – Sepp Eigenmann.

 

Dr Sepp isch am 30. Juli 1944 im Spitau z'Aarau uf d'Wäut cho. Gwohnt het d'Familie Eigenmann in Schafisheim. Mit 24 Johr hei dr Sepp und zwe Kollege bschlosse, mit Sack und Pack ds Aargau y Richtig Seeland z'verloo. Usschlaggäbend, dass d'Wau uf Büre gfaue isch, isch Zuesicherig vor e Arbeitssteu y dr Stotzer Spenglerei im Grabe gsy, jo dä mit de Ross und er e Hampfele Töchtere. Nach paar Johr het dr Sepp y d'Atem gwächslet um de churz drufabe bi dr Witschi Electronic AG sässhaft z'wärde. Bis zu dr Pension sy du schliesslech 35 Johr Firmezueghörigkeit drus worde.

 

A dr Mooschiubi isch es gsy, wo dr Sepp ds Marlis, ledige Name Weyeneth, het lehre kenne und sich bi unzählige Tänz hoffnigslos is Marlis verliebt het. Am 13. September 1968 hei du die Zwöi ghürote, mittlerwyle isch das scho 55 Johr här.

 

Mit em Umzug uf Büre isch dr Sepp am FC byträtte. Är het denn no nid chönne abschetze, was für e bsunderi Beziehig us däm Bytritt wird. Nume schutte, das isch für ihn nid y Frog cho. Wenn ig de scho mitmache, de lieber grad rächt. Und die Yschtellig het sich wie ne rote Fade dür die letschte 55 Johr dürezoge. Aus Spieler vo dr zwöite Mannschaft und später im legendäre "Drü" het dr Sepp Ämtli übernoo und Funktione usgfüehrt, gäng tatkräftig unterstützt vo syre Marlis (Ehremitglied FCB). Beidi sy ygschprunge wo Not am Mann gsy isch. So hei die Zwöi bi viu Aaläss und bi unzählige Mätsch am Charre gschriesse und gluegt, dass es vorwärts geit. Es isch für e Sepp und d'Marlis e Härzensaaglägeheit worde.

 

Funktionen:

• Mithiuf bim Erschteue vom Fuessbauplatz Lachen

• Mitglied im Schnitzubanksinge am Bürenöijohr

• Juniorentrainer

• Trainer vom "Drü"

• Ufbietende Sekretär

• Tätschmeister Fischessen uf em Lachen und am Ländtifescht

 

Vorstand:

1968 - 1969: Aufbietender Sekretär

1971 – 1975: Sekretär

1977 – 1978: Vizepräsident

1983 – 1989: Präsident

1993 – 2000: Chef Infrastruktur

2003 – 2006: Präsident

2011 – 2013: Beisitzer (beratende Funktion des Vorstandes)

 

Spezialaufgaben:

• Bauchef bei der Realisation des Garderobengebäudes

• Bauchef bei der Erstellung der neuen Buvette

 

Die Ufzehlig erhebt ke Aaspruch uf Vouständigkeit, irgendöppis isch sicher no ungere Tisch gheit. Gäu Sepp, du tuesch das verzeihe?

​

Aalässlech vo dr Generauversammlig vo dr Saison 1992/1993 isch dr Sepp, zäme mit em René Saisselin, verdientermasse zum Ehrepresidänt ernannt worde. Y dere verantwortigsvoue Position het sich dr Sepp y viu Aaglägeheite ybrocht und y guete und schlächte Zyte beratend und aapackend dr Vorstand und d'Funktionäre hiufrych unterstützt.

 

Ds Fischässe isch ou eis vo Sepp's liebschte Aalige gsy. Zäme mit em Willy Sutter hei sie es Duo biudet mit Legändestatus. Wenn dr gröscht Aasturm verby isch gsy, isch es de öppe mou rund zuegange und ds aaschliessende Ranzeweh isch de nid vo de Fisch oder vom Wy cho, sondern vom lache ab de schlagfertige und träffende Sprüch vo däm Duo, ergänzt natürlech no vom René.