FC Büren an der Aare
1938
Dr Fänki – we me ne kennt und müesst rate, y welem Schtärnzeiche är gebore isch, mi chiem mygottsdüüri uf Waage. Kontaktfreudig, diplomatisch, pünktlich, höflich, intelligent, kreativ. Das trifft uf e Noe Fankhauser vou zue.
Die Waage glänzt durch selbstsicheres Auftreten und hat eine lebensfrohe Art. Sie ist harmoniebedürftig und friedliebend und setzt sich daher für die ausgleichende Gerechtigkeit ein. Stets optimistisch und diplomatisch, versucht das Sternzeichen die Probleme ihrer Mitmenschen zu lösen und ist dabei verständnisvoll und vermittelnd.
Dr Noe oder "Fänki" isch am 2. Oktober 2002 in Biel uf d'Wäut cho und isch vo Chindsbeine a e waschächte Safnerer. 176 cm, es Kampfgwicht vo 83 Kilo und bruuni Ouge. Är het ds KV gmacht und schaffet aktuell uf dr Ywohnergmeind Lengnau. Wie's de mit em Bruefleche y Zuekunft söu wytergoo, isch ihm d'Erlüchtig no nid cho, do het är jo no aui Zyt vo dere Wäut. Syni Hobbys sy Schutte, cha jo fasch nid angers sy und Fotografiere. Bim Lieblingsässe chehrt dr Noe d'Waag use und wott oder cha nid Uskunft gäh, "viu Verschiednigs" bröselet är füre. Dr Ystee us em Subway hingäge het's ihm atoo. Aber Achtung jitz, bi dr Frog nach de 5 Sach für die einsami Insu toucht de ufsmou ds Bier uf, "gnue Bier, e Schuttbaue, ds Handy, e YB-Wurscht und nöii Socke". Ig ha scho zwöimou müesse läse, erschtunlechi Kombination. Öb ächt das guet chunnt? Ds Lieblingsgame, was chunnt ächt angers y Frog aus FIFA, fasch logisch, wie me obe het chönne läse.
Fuessbaukarriere
2006 – 2022 SV Safnern mit Abstächer Team Seeland (2014) und FC Solothurn (2015/16) und ab 2022 im Kader vo dr zwöite Mannschaft FCB. Mit dr Nummer 10 uf em Rügge isch dr Fänki nid dr Schpiumacher, im Schturm sorgt är für gnüegend Dampf im Aagriff.
Noe Fankhauser und Fabian Hänzi mit ihrem erfolgreichen Team Häftli C1 (Simon Hänzi fehlt)
Trainerkarriere
Aktuell trainiert dr Fänki d'Juniore C1 Team Häftli üsserscht erfougrych. Sy sie doch nach dr Vorrunde y d'Schtärkeklass 1 ufgschtiege. D'Trainerstatione vom Noe: 2019/20 Junioren D SV Safnern, 2020/21 Juniorinnen FF19 SV Safnern, 2021/22 bis aktuell Junioren C Team Häftli. Wär weiss, wo dä Wäg no häre geit? Ohni Diskussion, ds Züg drzue reschpäktvou mit Lüt umzgoo und engagiert e Ufgab aazpacke bringt är mit.
Christiano Ronaldo und dr BSC YB schtöö bi ihm fuessbauerisch z'oberscht. Wo schteisch du schportlech y füüf Johr? Furztroche d'Antwort: "Ke Plan"! Ds Rituau vor em Schpiu? "Z'ersch d'Schtüupe aalegge, bevor aues angere". Logisch, aber e geili Antwort!
Bim FCB schetzt dr Noe d'Kameradschaft und findet, das isch es super Team. Was ihm weniger gfaut, isch dr Wäg vo Safnere uf Büre a de Wuchenänd. Wägem Fahrverbot muess är e Umwäg y Chouf näh, das närvt. Das isch jo scho glungige Cheib dä Fänki: "Am Obe wieder chönne go schlofe", isch sy gröschti chlyni Fröid vom Autag.
So wies usgseht, wächslet dr Noe uf die nöii Saison zum FC Büren an der Aare. E grosse Gwinn für e FCB vom Mönsch und vom Trainer und Schütteler Noe Fankhauser här. Schön bisch bi üs! Mir schetze di ruhigi und kollegiali Art und dini Jungs, cha ig mir vorschteue, di abwächsligsrychi und interessanti Trainingsgschtautig und di kompetänt und offene Kommunikationsschtiu.