Syt dr Saison 2012/2013 isch dr Thomas Lauper üse Presidänt. Är het ds Amt vom Willy Rüttimann übernoh, wo gsundheitshauber het müesse i Usschtang träte. Aus Bisitzer het är sich dere Herusforderig gschteut u füehrt hüt dä Verein mit viu Gschick und weni Lärm. Zäme mit sine Vorschtandskollege chame finanziell und jitz ou fuessbauerisch uf ne erfougrichi Zyt zruggluege

 

Mit em Name Lauper chunnt am ne FCB-Mitglied schpontan mou ds Schutte i Sinn. Chrigu – Thömu – Luca! Aui drü begnadeti Fuessbauer und zu de Aktivzyte begährti Manne uf de Zedle vo de umliegende Vereine. Die Drei hei aber no angeri Gmeinsamkeite, Tröii zum Verein. Fasch usnahmslos, es paar
Abschtächer i de Juniorezyte, hei aui z'Büre
Karriere agfange und ou beändet, das wird
bim Luca nid angers si, wage ig z'bhoupte.
Taläntjäger si aube mit hängende Chöpf us
Büre abzöttelet. E wyteri Gmeinsamkeit
isch ds Angaschement für e Verein, sig
das für aazpacke wenn Arbeit aschteit
oder i dr Teppichetasche für ds Gschick
vom Klub z'leite. Arbeit vo drei
Generatione vo unschätzbarem Wärt.

 

Bsunne und ruhig, bodeschtändig u witzig,
paart mit ere schtarche Meinig. Adjektiv
wo uf üse Thömu träffend passe. Passe tuet
ou, dass är e perfekte Papi und e liebenswärte
Kolleg isch, wo e gwüsse Schalk und am rächte
Ort e passende Schpruch nid cha verlügne.

 

Sini Hobbies si FCB, FCB u grad no einisch FCB

(das gseht me), d' Familie wo ou aui mit em FCB

fescht verwurzlet sy, är chochet exzellänt und

gärn und  im Winter isch är mit dr Familie ds

Unterbäch am Schifahre.

 

Brueflech isch dr Thömu Bruefsbildner im
Kantonal-Bernischer Baumeisterverband in
Bern, wo är d'Lehrlinge dür d'Usbiudig
begleitet.

 

Thömu, du und dini Vorschtandskollege mache e grandiose Job, du geisch überau vorus u zeigsch wos düre geit. Do drfür hesch üse Reschpäkt und es härzlechs MERCIi a di und ou a dini Familie.