Wenn mir am René Saisselin si Gschicht im Zämehang mit üsem Verein wei verzeue, de längt das miggerige Format by wytem nid us, so bewegt isch si Gschicht. 1936 uf d’Wäut cho u scho 1952 aus Junior aktiv bim FCB. Das si sage und schreibe 68 Johr Vereinszueghörigkeit, definitiv e Itrag is Guinessbuech der Rekorde wärt.

 

Mit sim Itritt i FCB aus junge Bursch het dr René praktisch i aune Junioreteams mitgschpiut. Schöpter isch är mit em „Zwöi“ uf Punktejagd gange, bevor ihm dr Schprung is „Eis“ glunge isch. Irgendeinisch hets ihn packt, d’Amäudig für ne Schiedsrichterkurs isch pär Poscht uf Bärn, die zwöiti sportlichi Karriere isch lanciert gsi. I 25 Johr aus aktive Schiedsrichter (1960 – 1985), natürlich für e FCB, hets dr René bis i die 3. Liga ufe gschafft.

 

Während dr langjährige Mitgliedschaft si e Füui vo Ämtli, Funktione und Vorschtandstätigkeite dür e René i suveräner Manier gleischtet worde. 15 Johr drvo isch är Vorschtandsmitglied gsi und 5 Johr het är ds Presidänteamt bekleidet.

 

Jitz hei mir scho viu ufzeut, aber es chunnt viu meh derzue. Dr René het e bsunderi Schpürnase gha für Problem materieller oder finanzieller Art. Ohni grosses Fäderläsis isch do es Loch gschtopft worde, dört es fählends Dress organisiert u hie es nöis Grät glieferet worde. Grossi Verdienschte erworbe het är sich unger angerem ou bim Garderobebou und bim Bou vo dr Büvette. Es Fischässe über Johre ohne René, nid uszdänke! Ufboue, Fisch mache, zur Kasse luege, do es Schwätzli, dört es Witzli, abboue und am Schluss eine näh.

 

Dr René isch nid nume e grosse Gönner vom FCB, nei är isch ou e Mahner, eine wo graduse seit, was Sach isch. Mängisch isch dr Ton bi sine Gägenüber chlei barsch acho, aber viu mou si sini Bedänke Alass gsi, Schritte nomou z’überdänke, oder dr Gäudsecku no einisch z’chehre, bevor me gringsvora i öppis ine laueret. Legendär si ou sini Iwänd a de GV’s. Wehe es geit nid nach Statute zue. Hurti ufschtoh, Poschtornig abeläse u wyter im Text.

 

We mir üs erinnere, wie mängisch dr René aus häufendi Hand ygschprunge isch. Mi het nid emou müesse froge, isch är scho do gschtange. Und i schwäre Zyte, wo dr FCB zwiefulos ou düre het müesse, het e Zuestupf d’Exischtänz gsicheret.

 

Näbscht em Schutte isch dr René e begeischterete Schwingfan (Ehremitglied seeländischer Schwingerverband) und mit viu Härzbluet bim Jodlerklub Meiglöggli (Ehremitglied) derby.

 

Ig has Igangs erwähnt, die Zylete uf däm miggerige Format wärde am René nid grächt. Aber sie söue „üsem René“ dr Reschpäkt vo üs aune, verbunde mit em ne härzleche Merci überebringe!

 

I dr Zwüschezyt het dr René gsundheitlech schwär düre müesse u isch du gottlob am Samstig im Cöpspiu wieder uf em Lache erschiene. Mi het ihm d’Fröid agseh, nach siebe Monet ändlech wieder mou uf em Lache awäsend z’si. Mir wünsche dir René wyterhin gueti Besserig und viu gfröiti Stunde unger „dine“ FCB-Fründe.

 

Erschienen im Matchprogramm 16.08.2020 FCB – SC Aegerten