Es Mäntig-Ching isch üse Nicolas Hugi. Am 28. Februar isch är im Stärnzeiche Fisch uf d'Wäut cho. We me sich y dr Horoskopwäut chley umeluegt, liest me über e Fischmaa fougendes: Der Fische-Mann ist ein verträumter, ruhiger und etwas schüchterner Typ. Manchmal erscheint er daher zerstreut und nicht von dieser Welt. Er ist ein liebenswerter Chaot. Fische-Männer sind hilfsbereit und gelten als Superkumpel.

 

Luege mir einisch y sy Frageboge ine. Bi Stärken/Schwächen schteit: Offenheit, Organisationsgeschick, Allgemeinwissen und jitz liebi Damewäut, müesst dir lose, aber das wüsset dir jo scho: Extrem gutaussehend. Es Zwinker-Smiley isch hingedra. Schwächen, do isch dr Nicolas sparsam mit syne Ussage. Früh aufstehen und von Zeit zu Zeit ungeduldig. Fertig, de isch das auso aues gsy?

 

Schnipo, Spaghetti Bolognese, Minerauwasser und Bier sy d'Eggpfyler vo syne kulinarische Vorzüg. Blybe mir grad no bim Persönleche. Hobbys sy Fuessbau, Darts, Sport augemein, Fründe und Familie. Wenn muess gamet sy de Darts und Kart fahre. Im Usgang isch är mit em Auter fang ruhiger worde, isch es früecher dr Chessu ds Biu gsy bevorzugt är hüt ds Pub oder eifach im Stedtli, wo öppis los isch. Welche fünf Sachen packst du für die einsame Insel? Handy, Fussball, Dartsscheibe und so viele Freunde wie noch Platz haben. Glungige Cheib Nicolas!

 

Dr Nicolas, 175 cm gross, es Kampfgwicht vo 80 kg und blaui Ouge. Do cha ke Schwiegermueter me ruhig hocke! Kaufmann und säubschtschtändig im Familieunternähme Thomas Hugi, Küchendesign in Schnottwil. Auso Modis und Giele, wenn dir e Usschtüür bruchet, do gits ei Adrässe 

​

​

                                                           Thomas Hugi Küchendesign, Oberwilstrasse 3, 3253 Schnottwil.

 

Im Beriich Fuessbau schticht ei Antwort use. Hoffentlech y dr 4. Liga mit em Zwöi. Wo stehst du sportlich in 5 Jahren? Cha, jitz weisch was z'tüe hesch. D'Nummer 9 glänzt uf em Rügge, mittlerwyle isch är aber im Mittufäud e gfrogte Maa. Syt 2015 schpiut är im Zwöi. Im Juniorenauter het är d'Schtuefe vo F bis D ds Büre absolviert. Rooney, Rashford, Vardy und Manchester United sy im grosse Fuessbaugschäft syni Favorite. Zum Rituau vor em Schpiu ghöre Teigaffe und Red Bull zero drzue. Git das nid Ranzepfyfe? Isch e unmüglechi Kombination.

 

Syt dr Saison 2019/2020 isch dr Nicolas mit viu Angaschemaa Sekretär im FCB-Vorstand. Eine wo nit nume laferet, äbe ou lieferet. Kollegialität, Kontinuität und dr Zämehaut vo de Büre-Jungs schetzt är. Was de gar nid geit sy Type wo meine, sie chönni mache was sie wöue und de nächhär nid chöi häreschtoo. Die grösste kleine Freude des Alltags: "Nach em Training oder Match uf em Lachen blybe sitze und dr Nomittag resp. dr Obe gniesse". Mir sy derby Nicolas. Vor aune freiwiuige Häufer, wo me gäng cha uf se zeue, zieht är dr Huet und appelliert im glyche Atemzug a aui Trainings- und Buvetteysatzschwänzer unger de Aktive. Är setzt sich y, dass Regle ufgschteut und dür Vorschtand u Trainer rigoros umgsetzt wärde.

 

Das mag im besonders an Büren a/A: Myni viele langjährige Fründe wo z'Büre wohne.

​

Nicolas, du liebenswärte Chaot (wenn's de überhoupt schtimmt), bisch e geile Giu, schön di by üs z'ha!