Üse Thomi, das isch e liebe Cheib! U scho isch aues gseit. Mir verzeue glich no chlei öppis.

 

Am 12. Juli 1980 in Grenchen gebore, hets d'Familie Lerch im 1982 uf Arch verschlage. Dört het dr Thomi aui Schuele bsuecht, bevor är d'Lehr bi dr ETA in Grenchen aus Wärkzügmacher absolviert het.

 

Hüt isch dr Thomi e gschtandne Familievater, wohnt mit dr Familie, das isch si Frou d'Melanie und de beide Ching Robin und Luisa, in Büren an der Aare. Schaffe tuet är aus Montör in Niederönz bi dr Bystronic Laser AG. 1.87 gross, 81 kg Kampfgwicht und blaui Ouge, weme jitz no sini Charakterzüg kennt, isch är dr Troum vo jeder Schwiegermuetter.

 

Über Wacker Grenchen und FC Grenchen isch dr Thomi im 1999 zum FCB gschtosse und het ohni Unterbruch im Eis gschpiut. Do chame ruhig säge, wenn angeri mit Schutte ufghört hei, het dr Thomi ersch so rächt aagfange, es Urgeschtein und usem Team nid wägzdänke. Si bevorzugt Platz isch im Mittufäud, chopfbaustarch und e gueti Technik zeichne ihn us. Mi het sich mängisch gwünscht, dr Thomi wär chlei resoluter, würd mou zur Hut usfahre und säge, was Sach isch. Aber mi seit jo nid vergäbe, e Chräbs isch Bedacht uf d'Gfüu vo de Mitmönsche, isch hiufsbereit und guetmüetig, Reschpäkt und Fairness si ihm wichtig. Es erschtunt nid, isch sis Hobby d'Familie.

 

Är gfingt, Büre isch e coole Verein und schetzt Kameradschaft im Team. Ir dritte Haubzyt bim ne Bier isch är mit Lieb und Seu derby, dört geit är uf und ihm isch puduwou. Wenn jitz no öpper e Pizza uftischet, sis Lieblingsässe, de isch dr perfäkt Momänt erreicht. Haut, no guete Rock ghört derzue!

 

AC Milan und YB, Marco van Basten und dr Guillaume Hoarau, dört het är  gsetzt. Ds Lache vo sine Ching, das isch am Thomi sis Ein und Alles. Mir si froh, bisch bi üs. Geile Typ!