Di, 06.08.2024, 20:00h Uhr Cup in Safnern gäge FC Langnau
Es geit no 5 Tag, denn schriebe mir Zischtig, dr 6. Ouguscht, und dr Ärnscht vom Fuessbauerläbe geit wieder los. Wüu d'Ämmitaler vo Langnau e chley e wyti Aareis hey, isch das Cupschpiu uf Safnern verleit worde und wird am 20.00 Uhr apfiffe. Üse Nachbare fang scho es härzlechs "MERCI" für d'Gaschtfründschaft. Mir sy gschpannt, öb der Patrick Meier, üse nöi Eis-Trainer, dene Manne scho het chönne Bei mache. Es isch uf au Fäu e gueti Teschtmüglechkeit. Der FC Langnau het letscht Saison y ihrer Gruppe mit 26 Punkt dr 8. Rang erreicht. Sie sy auso chley erfougricher gsy aus mir und dörfte vo däm här e aaschtändige Gradmässer sy.
Sa, 03.08.2024, 18:00h Summercup Radelfingen, FCB – FC Schönbühl
Am Samschtig, 03.08.2024, 18:00h, findet dr Finautag vom Summer Cup (Delaay Delaay.G Sport) in Radelfingen statt. Üses Eis trifft im Platzierigsschpiu uf e FC Schönbühl. Y de Gruppeschpiu het me gäge Diessbach/Dotzigen und Radelfingen unentschiede gschpiut und isch wäge däm im chlyne Finau aangaschiert.
Der Kader schrumpft
Mir sie jo schlächti Nachrichte fange gwanet. Das jitz no üsi Goolihoffnig Tim Blatter dr Saisonuftakt verpasst, hät jitz nid umsverrecke müesse sy. E Finger isch es gsy, genau dr Ringfinger het schlapp gmacht - so ne Habakuk. Was es genau isch, chunnt de nach em Bsuech bim Schpezialischt us. Vo üs us "gueti Besserig Tim". Es wär jo no einigermasse z'verchrafte, wenn sich dr Simu Käser nid uf eim Scheichli würd dürs Läbe kämpfe. So gsehts bitter us. Schyns isch me am ne Expresstransfer. Dä Maa heisst Julian von Heydebrand, het Johrgang 2003 und het sy schportlichi Vergangeheit jitz aktuell in Walperswil und vorhär in Muttenz, Breitenrain, Diessbach/Dotzigen, Lyss, wieder Diessbach/Dotzigen und Walperswil.
Üse Ehrepräsidänt isch 80gi worde
Am Zischtig, 30.Juli 2024, het dr Sepp Eigenmann sy 80. Geburtstag dörfe fiire. Dr Marco Kocher und ig hey am Sepp es ygrahmets Dress vom Eis, bedruckt mit "Sepp 80", und es paar Gütterli feine Wy brocht. D'Wünsch vor FCB-Familie hey ihn sehr gfröit und är lot ganz härzlech lo danke. No einisch Sepp – ganz härzlechi Gratulation und häb Sorg zu dir.
Joel "Schöggu" Fuhrer
Am 23. Juli 2024 het dr Joel Fuhrer üs viu z'früeh verloo. Das tuet weh, macht unfassbar truurig und isch nid z'begriefe.
Am Frytig, 09.08.2024, 13:30h findet y dr reformierte Chiuche ds Büren an der Aare e Truurfyr statt. Es wär schön, wenn mir üs gmeinsam vo üsem guete Fründ Schöggu chönnte verabschiede.
Assistenztrainer gesucht
D'Juniore b mit em Trainer Manuel Scheidegger sueche e Assistenztrainer. Wenn du Fröid hesch, mit junge und ambitionierte Schütteler z'schaffe, de mäud di doch bim Joel Scheidegger, oder du lütisch am Mänu diräkt a, oder schriebsch es geils Bewärbigsbriefli. D'Juniore B trainiere jede Mäntig und Mittwuch.
Dasselbe giut ou bi de Juniore C mit em Trainer Cédric Mühlestein. Ou die Mannschaft trainiert Mäntig und Mittwuch.
Dr Ougschte im Überblick
15.08.2024, 19:00h, 88. Generalversammlung y dr Buvette
Es wär schön, wenn viu Aktivmitglieder, die sötte eigentlech obligatorisch aawäsend sy, a däm wichtige Aalass vor Ort wäre. Gät öich e Mupf oder minetwäge e Stupf is Füdle. Guet Houz!
Mir sy hocherfröit um jede Matschbau, vo de Aktive erwarte mir das, vo de räschtleche Mitglieder hoffe mir um öii Ungershtützig (hier downloaden). Härzleche Dank!
Haltet die Ohren steif!
Comments