Meisterschaft - 3. Liga / Gruppe 4 - 22.08.2021 10:15 - Rohrmatt, Schüpfen
Es hat reichlich Luft nach oben
Aufstellung:
Mikael Stauffer (C), Marco Günther (30' Roméo Bezzola), Denis Schneider, David Schläfli (75' Thomas Lerch), Manuel Bigler, Luc Gutbub, Fabian Schuler, Yannic Kubacki (58' David Probst), Joel Tüscher, Dario Leisi (88' Yannic Kubacki), Nikola Crnogorac
Ersatz: Roméo Bezzola, Thomas Lerch, David Probst
Abwesend:
Nick Eggenberger (Militär), Simon Käser (Ferien), Luca Lauper (Pfeiffersches Drüsenfieber), Men Meier (Militär)
Trainer: Reto Rüttimann, Patrick Von Felten
Medizinische Abteilung: Reto Steiner
Tore:
16' 1:0 Nick Jenni, 20' 2:0 Nick Jenni, 27. 2:1 Nikola Crnogorac, 44' 3:1 Nick Jenni, 80. 4:1 Jannis Schüpbach, 83. 4:2 David Probst
Bemerkung:
Nick Eggenberger unter den Zuschauern. Schade, seine Kampfeskraft und sein Einsatzwille hätten ein belebendes Element im Spiel des FCB sein können.
Der zwölfte Mann:
Flotter Aufmarsch unseres zwölften Mannes in Schüpfen.
Haubzyt 1:
Mir hei im Vorfäud vo däm Spiu gschribe, dass es e kniffligi Saison 2021/22 wird gäh. Es gschrumpfts Kader, keni optimale Vorussetzige dür ds Hochwasser im Trainingsberich. Aber äbe nid lang chlööne, d'Finger usenäh und die Manko mit Ysatz und Wyue kompensiere. Das hät eigentlech söue ds Motto sy., mit Betonig uf söue.
Wenn sich das Spiu so entwicklet, wie's dr Aafang offebahrt het, de potz woumääu, de git das über 90 Minute es Knorz und gar nüt für e Fuessbaufinschmöcker. Fäupäss, Bauverlüscht, abverheiti Dribblings, längi Bäu wo kene cha kontrolliere, uf beide Syte es Agiere uf em ne mässige Niveau. Schüpfen, körperlech chlei robuschter ufgschteut, het nach em ne Zytli besser is Spiu gfunge. Däm het e früeche Usfau vom Marco Günther no Vorschueb gleischtet. Ersetzt worde isch är dür e Roméo Bezzola, wo bis zum Abpfiff e Pluspunkt im Team isch gsy. Das Schüpfen ir 16. und 20. Minute het chönne 2:0 vorlege, isch nid ds Resultat vo Überlägheit gsy, nei, Büre het mit Unkonzentriertheite und grobe Schnitzer dr Wäg zur Füehrig gäbnet. Dr Aaschlussträffer vom Nikola Crnogorac hät chönne e Weckruef sy, het aber d'Würkig verfäut, z'viu isch de Bürer misslunge. Wenns Glägeheite zum ne erfougriche Aagriff gäh het, sy sie mit zweni Präzision z'änd gfüehrt worde. Krethi und Plethi het scho ghofft, mit em ne knappe Resultat y d'Pouse z'go und de ir zwöite Hauzyt aazgriefe. Es hät nid söue sy, e wyteri Unzuelänglechkeit het Schüpfen zum 3:1 usgnützt.
Zwüschebilanz
Im Spiu vo Büre het me gmerkt, dass dür d'Abgäng und die fählende Spieler z'Gfüeg no nid grifftt. Dr Maa, wo cha Rueh is Spiu bringe, dirigiere und d'Bäu verteile, het sich a däm hütige Spiutag no nid usekristallisiert. Nid z'verwungere, aber haut eifach cheibe schad, dass me eine vo de vermeintlech schwächere Gägner nid cha y Verlägeheit bringe.
Haubzyt 2
Nämers vorwäg, es isch nid besser worde. Z'Niveau isch über die ganzi Spiuduur öppe glych längwylig gsy, wie ds Spiu säuber. Mygottstüüri, chnüblisch im Gring ume und gfingsch keni gschiede Wort, wo dr Bricht einigermasse chöi ufpeppe.
Keni vo beide Mannschaft het sich chönne steigere. Schüpfen, gäng e chlyne Schritt vorus het gmerkt, dass sie mit Minimalischtefuessbau düre chöme und dr FCB isch nümme i dr Lag gsy, entscheidend Chräft frei z'mache. Ds 4:1 ir 80. Minute, öppe so zwingend wie die angere Gou, het d'Hoffnige vo de Bürer-Fans ändgüutig begrabe. E kompromisslose Diräktschuss unger d'Latte vom David Probst, em Chrafttraining sei dank, isch e schöne Schlusspunkt gsy, aber haut glych nume Resultatkosmetik.
Fazit
Dä Gägner wär z'packe gsy. Was Schüpfen bote het, isch Durchschnittschoscht. Wenn's Büre zuekünftig nid verschteit, söttigi Gägner z'packe, wird das Unterfange Ligaerhaut sehr, sehr schwär. Aber Büre isch no immer ufgschtange und das erwarte mir am nöchschte Samschtig uf em Sportplatz Aare in Orpund.
Hopp FCB!
Comments