27. April 2019, 16:00 Uhr, Sportplatz Lachen Büren an der Aare
Hüt het me sech d'Chance verchachelet, wyter a dr Schpitze z'blibe und uf d'Gägner Druck uszüebe. Längnou het gwunne und isch jitz 5 Punkt vor Büre, Müntschemier het ou gwunne und isch 4 Punkt vor Büre. Einzig Grüenschtärn isch so lieb gsi und nach em ne Unentschiede mit 1 Punkt vor Büre i unmittubarer Richwyti. Klar si no sächs Schpiu, mi muess no uf Längnou, Grüenschtärn chunnt no uf Büre u Längnou het deheim no Müntschemier. Grad ufgäh tüe mir no nid. D'Hoffnig schtirb zletscht. Hopp FCB!
Unterschiedlecher chönnte die zwe Klubs nid si. Dr. FC Besa Biel/Bienne schribt uf ihrer Houmpäitsch: "Der FC Besa Biel/Bienne ist das Ergebnis der Fusion der Fussballvereine KF Rinia und FC Ceneri. Ziel dieser Fusion war die "Vereinigung" der albanischen Spieler in einem Verein, um dadurch fussballerisch stärker zu werden und die Werte der albanischen Kultur einheitlich zu verkörpern. Der Verein begann sein Dasein ab dem 1. Juli 2010 (der FC Ceneri wurde im Jahre 1951 gegründet). Für den FC Besa steht die Disziplin und das Fairplay an oberster Stelle".
Bekanntlech isch dr FC Büren an der Aare im Januar 1938 gründet worde. Im Gägesatz zum FC Besa Biel, sie hei Teams i dr 2. Liga regional, 4. und 5. Liga u wachse schtetig, het Büre ender müesse Fädere loh und lehre chlineri Brötli bache.Mi het i dr. 2. Liga (1964/65 – 67/68, 2009/10 – 13/14),i dr Saison 2014/15 wider ir 3. Liga und ab dr Saison 2015/16 i dr 4. Liga gschpiut. Aus Landklub mit ere grosse Dichti a Fuessbauklubs ir Nachbarschaft, isch das haut, im Gägesatz zur Schtadt, steinigere Bode. Ds Schaffe mit Juniore wird ir Zuekunft richtigswiesend si und so Büre hoffentlech wider i die 3. Liga bringe, wo dr FCB eigentlech ou häreghört.
Ufschtellig FCB:
Beyeler Jarno, Schläfli Dävu, Schtouffer Eric, Lopes dos Santos Ruben, Günther Marco (65. Rüttimann Reto), Schneider Denis (65. Kubacki Yannic), Lerch Thömu (C), Tüscher Yannik, Scheidegger Mänu, Schueler Fäbu, Louper Luca
Ersatz: Eggenberger Nick, Hofer Mischa
Träner: Tüscher Pädu, Vo Fäute (VoFi) Patrick
Die gueti Seu und immer presänt: Schteiner Reto
Verletzt si:
Imperiali Diego, Kocher Damian,Tüscher Schöggu, Schtouffer Miggu.
Schiedsrichter: Dä hets im Griff gha!
Gou:
29. 0:1, 49. 0:2, 63. 1:2 Louper (Penauti), 75. 2:2 Eigegou, 80. 2:3
Ds Wätter het wunderbar zum Resultat passt. Räge, Wind, zwüscheine chlei Ufhäuige u teilwies no chaut, April haut. We me vor em Schpiu Tabäuesituation schtudiert het, isch d'Hoffnig präsänt gsi, dass nach däm Wuchenänd Büre bi dr Musig no mitmarschiert. Jitz wird’s haut chlei es Gschtouper, wichtig isch i däm Fau, dass me nid vouständig uf d'Schnouze gheit. Jitz isch nume eis gfrogt, d'Finger usezieh u Vougas!
Dr FCB isch vo Afang a derby gsi, het munter druflos gschuttet und über wyti Schtrecke Zepter i dr Hang gha. Wär dr Matsch gäge Ins gseh het, het chönne Parallele feschtschteue. Guet gschuttet, schöni Schpiuzüg produziert, aber vor em Gou wie dr Chüngu vor dr Schlange. Mi het eifach die Chischte ums verrecke nid wöue träffe. Derby het Besa nid grad e munzige, aber doch e chline Goli gha, wo eim chlei vorcho isch, wie ne Gangglicheib (ou e Parallele zum Schpiu gäge Ins). Aber, und das muess me ihm z'guethaute, dä het so viu Baukontakte gha, dass är für mi dr Matschwinner isch gsi. Was si Grössi nid häregäh het, isch dür sis Schtelligsschpiu, haut ou ne chlei Glück und ere guete Abschirmig vo sine Vorderlüt wettgmacht worde. We bi de Fotos Torrumszene vor em Besa-Gou, vornähmlech ou us Corner, ahluegsch, faut uf, dass Besa meischtens mit 8 Maa si im Sächzähner gschtange. Vo de Bürer si de drei scho viu gsi. Bi der Mängi vo Corner hät haut ou meh söue useluege, aber de muesch haut de mit em Körper dra u dr Gring häreha. Das isch nid z'erschte Mou, wo eim die Schwächi eklatant uffaut. Aber – ig ha's scho gseit – Büre het munter mitkickt und unzähligi Chance nid verwärtet. Im Gägesatz zu Besa, die si gfüeuti siebe Mou vor em Jarno uftouchet und hei zwöi Gou gmacht. E schöni Flugilag vom Jarno hesch gar nid chönne beschtuhne. Bim schaffe würd me säge, är het Churzarbeit gha. Wie das haut de öppe ou dr Fau isch, chunnt de zum eigete Unvermöge no Päch derzue. Dr vermeintlech Usglichsträffer wär eigentlech es korräkts Gou gsi, das het ou e Funktionär vo Besa üs gägenüber beschtätigt. Aber wäge däm einzige Foopa vom ne guete Schiri, het Büre wägerli nid verlore.
Büre het scho ke schlächti erschti Haubzyt gschuttet, z'Usnütze vo de Gouchance tüe mer nid berücksichtige. Aber i dr zwöite Haubzyt het mo so was vo dominiert, dass es dopplet weh tuet, gschitteret z'si.
Ganz guet het a däm Tag dr Club99 si Sach gmacht. D'Mitglieder si zum ne Apéro iglade gsi und ou zaurich erschiene. Während und nach em Matsch het me chönne Raclette ässe, bis eim dr Chäs zu de Schue usgloffe isch. E super Alass! Es grosses merci a d'Lüt, wo im Isatz si gschtange.
Nöchscht Wuche geits am Samschtig am siebni (19:00 Uhr, völlig dernäbe) uf em Längäud 2 in Biel gäge FC Iberico Bienne wyter. Dörfe mir mit ere Trotzreaktion rächne?
Comments