Und wieder isch es Johr verby. Das git eim aube Glägeheit, zruggzluege, oder wie me so schön seit, z'reflektiere. Was het sich aues y üsem Verein ereignet, wo üs gfreut, bewegt oder y Erschtuune brocht het. Oder schlicht und eifach Autag isch vom ne Verein. Ig cha öich säge, es isch es bewegst, jo mängisch es dramatisch's Johr gsy, mit Hochs und Tiefs, mit Fröid und Leid.
Jänner
Im Januar, dr Fuessbau steckt ganz töif im Winterschlof und ds aagfrässne Ränzli vo de Wiehnachtsguetzli, em Wiehnachtsbrate und em Fondue Chinoise lydet no zünftig, isch nume eis Trumpf – ds Büre Nöijohr. Dr FCB isch syt Johrzähnt mit dr Schnitzubank ungerwägs und viu FCBler löö sech's nid lo nä, mit em ne Wage am Umzug derby z'sy und am Erschte und am Zwöite uf dr Gass, wüu Beize hets jo fasch keni mee, ds Sou usezloo. Gäge Ändi Januar geits de y dr Buvette höch zue und här, dr traditionell FC-Jass schteit vor dr Tür. Über sächzg Jasserinne und Jasser träffe sich zum ne gmüetleche Aalass mit viu jasse und öppis zäme ässe und trinke und am Schluss gmüetlech no usplampe. Und wenn de no dr Tüfu syni Finger im Schpiu het, gwinnt de no ds Favoritepäärli vo Oberwiu. The same procedure as every year, gäu Baschi.
Dä Monet isch ou y Sache Sponsoring e Vouträffer. D'Firma Baronello Gipserei und Malerei us Biel angaschiert sich längerfrischtig bim FCB. Syt dr Rückrunde schteit e Matchuhr uf em Lache. E "Standing Ovation" isch ds Mindeschte, wo mir chöi tue.
Februar
Langsam, aber sicher rückt dr Fuessbau wieder y Fokus. No nid grad bi üs vom Fuessvouk, nei, aber de sicher afe bi üsne Aktive. Fertig umeblööterle, fertig chley ir Turnhaue umegümperle, üse go seckle, use y Dräck und luege, dass d'Lunge zu Volume chunnt und d'Wadli schygg y Form chöme. Y zwe Monet wärde d'Schueh wieder gschnüeret und de heisst's Vougas gä, mit em zwöitletschte Platz isch me nid grad dr Krösus vo dr Liga. Und ehrlich, nume abschtiege, dass me wieder cha e Ufschtieg fiire, isch scho chley gmerliget.
März
D'Vorbereitige uf d'Rückrunde vo de Mannschafte loufe uf Hochtuure. Ou uf de Plätz geits zur Sach. Ds erschte mou määje und striegle und Mitti Monet wird scho die erschti vo gsamthaft vier Gabe Dünger verteilet. Ds Hochwasser vom vergangene Dezämber het dr Platz usgmerglet und verdichtet. Ou für e Platzwart und sy Chef isch ds Motto "Finger usenäh"!
Apriu
Ändlech geits los. Dr FCB reist uf Ins und hout ds erschte Punkt gäge ds Team Ins/Müntschemier. Im zwöite Schpiu begrüesst der FCB uf em Lachen e Delegation vo OLKA. Üsi öschtriechische Fründe sy zwe Tag do gsy und hey nach em Match mit üs zünftig gfiiret. Ds Schpiu a däm Tag isch usecho, wie fasch gäng y de letschte Johre, Rüti gwinnt, und das mit 2:3. Treten an Ort. Ou ds nöchschte Schpiu in Täuffelen verlüüre üsi Jungs 2:3, Tristesse pur. Aller schlechten Dinge sind drei. Ou gäge Zollikofen uf em Lache luege mir wieder mit 2:3 y d'Röhre, es isch nid zum derby sy. Dr nöchscht Gägner verheisst ou nüt guets, es geit nach Bolligen. Und tatsächlich hey üsi Cracks ke Chance und verlüüre sang- und klanglos 4:0. Dr Abschtiegskampf wird dramatischer.
Mai
Gäge Ittigen, es wird deheime gschpiut, schteits nach 37 Minute 1:3 für e Gascht. Mit viu Kampfgeischt glycht dr FCB bis zur 85. Minute us und hät dä Matsch no chönne gwinne. Es hät nid söue sy. Und jitz wirds ganz plötzlech sehr ärnscht. Dr nöchscht Gägner heisst Münchebuchsee. Eis Punkt liege sie vor Büre uf em ne Nidabschtiegsplatz, dä wo mir de wei am Schluss. Nidau isch jo eh kes Tema mee, dass die dobe blybe, chiem am achte Wäutwunder glych. Am Hingerletscht isch bewusst, do muess e Sieg häre, aues angere wär e Vorentscheidig und nid y üsem Sinn, potzwoumäu. Das isch die Chance a ds rettende Ufer z'choo. Und tatsächlich, ir 83. Minute macht dr Luca Lauper mit em ne Penauti aues klar. Dä so wichtig Sieg isch am Trochne und dr FCB schteit z'erschte Mou nümme uf em ne Abschtiegsplatz.
Zmitts y Abschtiegskampf wird am Wuchenänd vom 10./11./12. Mai ds Fischässe uf em Lachen düregfüehrt. Wie eh und je überzüge die feine Fisch und locke Vöukerschaare uf e Lachen, wo sech das kulinarische Highlight nid wei lo entgoo.
Und dr Vorschtand lot d'Chatz zum Sack us und git bekannt, dass dr Vertrag mit em Slobodan Pranjic nümme verlängeret wird und dr Patrick Meier uf die nöii Saison übernimmt.
Und gschuttet wird ou wieder. Büre muess uf Orpund und chunnt mit ere 5:0 Packig hey, potz wüeschti Wuuche! Aber ou Münchenbuchsee verlüürt. Es heisst düreschnuufe und hoffe und bange.
Juni
Ändlech isch sie do, die nöii Türe für d'Buvette. Kennzeichnet vo so mängem fiese Ybruchversuech, het sie usgseh, aus hätt se e ganzi Herde Chüe ir Schnure gha.
9:1 isch ds Verdikt gäge vorzytig Abschtieger Nidau und dr FCB verschafft sich Luft, wüu Münchenbuchsee ernöit verlüürt. In Bärn gäge Esperia füehrt dr Gaschtgäber mit 4:1, wär hät zu däm Zytpunkt dänkt, dass no öppis z'bewege isch? 86. Minute, dr Fabian Schuler macht 5:5 und y dr verflixte 90. Minute überchunnt der FCB no 6:5. Und plötzlech weiss me us Täuffelen, dass Münchebuchsee äbefaus y dr 90. Minute ds 2:1 het müesse entgägenää und mit Nidau abschtiegt. Ds letschte Schpiu gäge Aegerten, dr Usgang isch nümme relevant, geit 5:1 verlore. Das me nid y d'Viertliga abetroolet isch, entlock üs es "Näbem Füdle y Bode"!
D'Fiir zum Saisonändi am 22. Juni 2024 uf em Lache mit Bar / Grillade / DJ Manifique & Magic Cha und Live uf dr Lachen-Bühni XOffender isch einisch mee e Erfoug gsy und het e grossi Schaar FCB-Fründe mobilisiert.
Juli
Dr Patrick Meier schteit z'erschte Mou mit dr erschte Mannschaft uf em Trainingsbitz und d'Gruppeyteilig für d'Saison 2024/2025 wird bekannt und bringt em FCB e Cocktail vo machbare und fasch unmügleche Schpiu, vorauem d'Bärnerteams FC Bern, FC Bolligen und FC Prishtina Bern wärde zur ächte Herusforderig.
Ougschte
Jitz chöme mir zur Lieblingsdisziplin vom FCB – dr Cup. Meischtens isch das e churze Chut und dä Gschpass isch Vergangeheit. In Safnern gäge FC Langnau tritt der FCB mit ere Vereinsuswauu a und geit ghörig go bade (0:8).
"Ohni FCB cha e Fisch läbe, aber ohni Fisch cha dr FCB nid läbe"! Auso Modis und Giele a d'Seck, reschpektive d'Schöibe (Schürze) aahänke und Fisch frittiere, Brot absable, Zitrone schnyde, Mayo uf ds Täuer schlaarge, Bier zapfe, Wy parat mache und Blööterliwasser uf ds Tablo, hopp hopp und de blitzartig abdäsele zum Chund. E Guete! Ds Ländtifescht vom 8./9./10.08.2024 isch ou wieder Gschicht.
15. Ougschte 2024, zwe Tag bevor der FCB y d'Meischterschaft schtartet, wird a dr GV ds vergangene Johr wie am Schnüerli düregnoo und Gschäft für Gschäft emotionslos düregwunke. Dr Presidänt David Schläfli wird mit Chlatsche verabschiedet und aus Co-Presidänte wärde dr Thomas "Pele" Sutter und dr Stefan Rothacher mit Applous gwäut. Nöi im Vorschtand ou dr Luka Skvorc aus Schrieberling und uf gwüsse Pöschte hets no es Grangg gää. Skvorc für Hugi, Hugi für Vofi, kene für Willy, ab zum nöchschte Traktandum, mir wei jitz es Bier.
Gäng wie gäng, geit de zmitts y de Summerferie d'Meischterschaft los. Dr FCB het es schwärs Los zoge. Drei Ufschtiegsaschpirante grad zum Aafang, do weisch was hesch. FC Prishitina Bern - FCB 5:1, FCB - FC Bolligen 1:5, FC Bern 1894 – FCB 4:0! Guet Nacht am Sächsi! So isch das de nid planet gsy.
Septämber
Enusode, de muess haut Aegerten dra gloube, zagg e Amsle, 2:8 verloore. Viu schtrüber chame nid y ne Meischterschaft schtarte. In Schüpfen git me liechtsinnig die nöchschte drüü Punkt zu de Finger us und in Täuffelen schtartet me formidabel, bevor e früechi roti Charte d'Bemüehige zunichte macht. Gäge Ins/Müntschemier isch me mit em Gägner uf Ougehöchi und verlüürt am Schluss glych mit 2:4, eifach ou, wüu d'Träffsicherheit und dr Muet öppis z'probiere, Schiffbruch erlydet.
Oktober
E Bombeschtart, erschti Minute, erschts Gou, Fabian Schuler, Büre füehrt. Siebzigschti Minute, roti Charte Büre. Quintessänz, trotz gueter Leischtig, ja sogar liecht überläge, ou y dr Ungerzau, gwinnt Grünstern 3:1. Ändlech, ändlech dr erhofft Sieg. Gäge FC Aarberg muess dr FCB ab dr 31. Minute dezimiert (gäubroti Charte) um Punkt kämpfe und belohnt sich mit ere kämpferisch ufopfernde Leischtig mit em ne Sieg. Es chunnt no besser. Es geit jo, me cha jo gäge Rüti gwinne! Völlig verdient gwinnt dr FCB ds Derby gäge Rüti mit 2:1 und blybt uf em letschte Platz mit sächs Punkt, aber dr Gump übere Schtrich isch dank minimaler Differänz no müglech.
Novämber
Am 15. Novämber het dr Club99 sy GV y dr Buvette und lieferet am FCB wieder a aaschtändige Batze, zur Bewäutigung vo de höche Chöschte, ab.
Die letschti Aktivität uf em Schuttplatz isch meischtens d'Lacheputzete. Für am 23. Novämber het dr Tätschmeischter Marco Kocher es ambitionierts Programm uf Bei gschteut. Derby het är d'Rächnig ohni d'Wättergötter gmacht. E Hampfele Schnee (20 Santimeter?) het für tiptopi Schneeverhäutnis "Pulver gut" gsorget, aber verschiedeni Vorhabe zum Schytere verurteilt. Trotzdäm isch es e arbeits- und erfougryche Tag gsy.
Dezämber
Am Wiehnachtsmärit, aafangs Dezämber, isch ou dr FCB mit Ärbssuppe und Gnagi aawäsend gsy und het rübis und stübis aues verchouft. Wie immer e glungene Uftritt und Präsänz im Schtedtli zeigt.
Dr Juniore-Chlouser isch dr aueriletscht Aalass vom Johr und vor auem für die chlyne Chnöpf dänkt. E stattlechi Aazau Ching sy mit de Eutere uf em Lachen ufmaschiert und hey für ne erfougryche Abschluss vom Johr gsorget.
Truurigs und Gfröits
16.01.24: Geburt Amelia Valea Tüscher
23.07.24: Todesfau Joel "Schöggu" Fuhrer
05.09.24: Hochzyt Luca Lauper und Stefanie Mast
14.09.24: Geburt Lenny Kocher
28.11.24: Geburt Keanu von Wartburg
Schlusswort
Dr FCB het im 2024 uf grossartigi Zueschouer, aangaschierti Sponsore und Gönner und uf schaffigi Mitglieder chönne zeue. Das git Zueversicht, die aaschtehende Herusforderige vo de nöchschte paar Johr chönne z'präschtiere.
Mir fröie üs, es wyters Johr mit üsne Sponsore und Gönner dörfe y Aagriff z'nä und danke ganz härzlech für's Angaschemaa.
Dr FCB wünscht aune e guete Ändspurt y Johreswächsu und es gsunds und erfougrychs nöis Johr.
Und nid vergässe - hopp FCB!
Dezember 2024 /H.P. Gribi
ความคิดเห็น