Lieber Rugelimugger – Teil 2
Jitz hey mir äxtra e Bärefaue grichtet und dä Bär (das bisch du) isch nid druf ynegheit. Hesch am ne angere Ort schöneri Rugeli gfunge u de no söttigi wo uströchnet sy, oder hesch eifach dr Gagg i de Hose wägem KAWUMM? Wenns dä mit de Hose isch, hey mir e Supertschob gmacht und wenn nid, möchte mir scho gärn ufdatiert wärde.
Warum tüe mir scho wieder gusle und di is Rampeliecht rücke? Wüu liebe Rugelimugger, äs nie positiv isch, wenn me sy Arbeit nume haubbatzig macht. Jitz hesch bi Nacht u Näbu scho meh aus e haube Schter heygschleipft, derby dr Ggofereruum vermoret und wäge däm vor Frou e Chlapf yghandlet und so viu Adrenalin usgschtosse wie ne top dopte Schpitzesportler im 37igschte Früehlig. Gib dir e Mupf und mach üs das Plätzli frei, wüu – und jitz muesch guet ufpasse! Dr nöchscht Termin wo dr FCB wieder tuet houze isch nümme so fern.
Vor em Rückrundebeginn mache mir no e Lachen-Putzete und bi dere Glägeheit wärde die Böim wo nümme grad dr früschischt Ydruck hingerlöh, umgloo. Und de gäh mir üs die auergröschti Müeh, die Rugeli y ne Grössi z'soge, wo sech zum mugge super eigne, so zsäge uf Mugggrössi verarbeitet. Söu mir die Cheibe ou no grad schpaute, es schlot dir de weniger y Rügge, wüu's haut ou uschaflig grösseri Rugeli derby het. Aber du bisch jo nid so ne zarts Pflänzli, näh mir jitz mou a.
Auso liebe Rugelimugger, d'Finger usezieh und mach di as Wärch. Nid vergässe, tue de Plane y Ggofereruum, schüsch gits de wieder roti Ohre.
Houz isch heimelig! Tschüss!
Wie du aus Kenner uf däm Biud chasch feschtschteue, ha ig dä kümmerlech Räschte a Rugeli no chley aschtändig biegelet, damit's chley e Schnure macht. Linggs vom Biegeli hets de no e Finnecherze. Wenn die i Ggofereruum bringsch und nächhär vor versammleter Familieschaar aazüntisch, chasch di de a de Ahhh und Ohhh's vo Frou u Ching ergötze und de bisch de bi dir Familie definitiv e geile Cheib!
Comentários