FC Büren an der Aare
1938
David Probst "Pröbstu"
Sit 21 Johr isch dr David Probst, mit em ne munzige Abstächerli vor e Saison zum FC Diessbach/Dotzigen, scho Mitglied bim FCB. Im zarte Auter vo 9 Johr het die houprigi Karriere bi de Juniore aagfange. Warum houprigi Karriere? Ganz eifach – dr Pröbstu ghört, us de verschiedenschte Gründ, y d'Kategorie vo de ewige Talänt. Zur rächte Zyt het dr fautsch Trainer nid a ihn gloubt, oder zum lätze Zytpunkt het dr David e Durchhänger gha. Ds Talänt het är immer mit sich umetreit, aber es het eifach umsverrecke nid wöue sy mit em ne Startplatz ir erschte Mannschaft. Aber eis chame ihm nid vorwärfe, isch Not am Mann gsy, isch uf e David immer Verlass gsy. Bi dene Glägeheite het är de mehrmous syni Fähigkeite uf em Platz uspackt und mit schöne Gou brilliert. Eine isch sicher froh, isch die Fuessbauerkarriere nid zu schteil zum Bode usgschosse. Jo genau - dr Charlie Maffeo. Är het sich uf ne absolut verlässleche Schpieler und Leithammu chönne verloo.
Lueget das schmächtige Buebali y dr vordere Reihe rächts a. Das isch dr Pröbstu im Auter vo 18 Johr uf dr Mannschaftsfoto vom Zwöi im Johr 2011.
Dä schmächtig Bueb isch hüt es Chraftpaket. Näbscht em Fuessbau isch Fitness sys Hobby. Wo me Chraft ufbout, muess me ou rächt fuettere. Poulet-Flügeli mit Nudle und es Cola Zero und dr David wird sanft wie es Lämmli.
D'Froge um Freizyt und die gröschti chlyni Fröid vom Autag, potzwoumäu, do chunnt är de zum Busch us. Usgang wo? Überau, wo e gueti Party schtiegt. Däm Verlange sy schynbar keni Gränze gsetzt. U dä mit dr Fröid, do chunnt prompt "e Partie Bier-Pong mit Fründe". Es Feierbiest dä Pröbstu! Vougas und e Nimmermüed. Jitz chunnt no ds Highlight vo de Antworte us dr Frogelischte. "Pröbstu, weli 5 Sache nimsch du mit uf die einsami Insu?" D'Antwort isch ungloublech u zeigt, dass är e mit em ne gsunde, mängisch chley trochene Humor gsägnet isch.
10 Kilo Mayonnaise, es Zäut, d'Fründin, es Jagdmässer und es Boot! Die Antwort chasch nümme toppe.
Dr David Probst isch am 13. September 1993 ds Bärn uf d'Wäut cho und isch e waschächte Bürer. Vom ehemaus schmächtige Büebli isch hüt nüt meh z'gseh. 175 cm gross und 85 Kilo schwär und Muskle bis a Bach abe.
Usbiudig und Bruef
Sys gmögige Wäse und sy Sozialkompetänz sy schlussändlech ou für sy Bruefswau Pate gschtande. D'Lehr aus Kaufmann und d'Vorschtellig e Bürojob z'mache hey ihn nid befriediget. Är het dr Bachelor of Science y sozialer Arbeit abgschlosse und schaffet aktuell bim Sozialdienscht in Biel.
Stärnzeiche Jungfrou
Ihr unstillbarer Wissensdurst und ihr meist hoher Intellekt sind prägend für dieses Sternzeichen. Des Weiteren gehen sie Probleme praktisch, logisch und mit einem ausgeprägten Sinn für Details an. Dadurch sind ihre Lösungsansätze oft sehr geradlinig und pragmatisch. Durch ihre meist bescheidene und zurückhaltende Art sind sie ausserdem ein sehr beliebter Ratgeber so wie Zuhörer. Steht ein großes Projekt an, welches bis ins kleinste Detail geplant und durchgeführt werden muss, ist die Jungfrau die Person Deiner Wahl!
Sportlech
Über das Thema hei mir scho es paar Wort verloore. Ir zwöite Mannschaft vom FCB het är ds Achti uf em Rügge. Uf em rächte Flügu oder de im Schturmzäntrum isch sy Würkigskreis. Kes Wunder, isch dr Fernando Torres sy Lieblingsfuessbauer. Wiuig und schnäu, aber nümme ganz soo schnäu wie früecher (d'Muskle müesse jo schliesslech nochetreit wärde), suecht dr Pröbstu meischt dr chürzischt Wäg ufs Gou.
Es paar interessanti Froge sy unbeantwortet blybe. Isch das Usdruck vo Bescheideheit und Zrügghautig, oder wott är eifach nid z'viu prysgäa? Item mir akzeptiere säubschtverständlech Privatsphäre u gää üs mit 10 Kilo Mayo z'fryde.
Am FCB ma är d'Kameradschaft und a Büre säuber dr Dörfli- reschpektive dr Schtedtligeischt.
Pröbstu – geile Cheib und unverztichtbar. Du hesch üs no gfäut y dr Wurmbüchse!