Was dr Mänu bis y d'Saison 2020/2021 uf em Rase abglieferet het, zeigt är ou aus Trainer by de Juniore B vom Team Häftli (Safnern).Viu Begeischterig für e Fuessbau, Ysatz, Usduur,  Entschlosseheit und dr Wiue, öppis z'bewege und nöii Wäge z'go.

 

Fuessbauerisch Wärdegang

Dr Mänu isch am 11. Januar 1986 in Büren an der Aare aus erschte Sohn vom Hans und dr Marianne Scheidegger-Schwab uf d'Wäut cho. Bereits zwüsche vier bis füf jährig isch dr Mänu mit em Fuessbau y Kontakt cho. Sys Talänt isch usegschtoche und es verwunderet nid, dass Taläntsuecher vor Umgäbig sy häuhörig worde. Bereits mit 12 Johr isch dr FC Biel die erschti Schtation ir Karriere vom Mänu worde. Dört het är die wichtigschte Schtatione yr Usbiudig vom ne Junior dürloufe. Wenn's de a d'Usbiudig geit, müesse sich viu jungi Fuessbauer entscheide, was wichtiger isch, Fuessbau oder Bruefskarriere? Das isch bim Mänu ou nid angers gsy. Fouglech chame dä Ufwand mit meh aus zwöi Träning pro Wuche nümme uf sech näh und suecht sich e angere Club. Zur der Zyt isch dr FC Orpund e gueti Zwöitliga-Egippe gsy und die hey dr Mänu mit Handkuss gno. Das Gaschtschpiu het vo 2004 – 2007 duuret.

 

Fasch bim FC Basel glandet

Wär die cheibe Lehr (Schportartikuverchöufer) nid gsy und hät dr Mänu sys Chnöi nid müesse operiere, wär weiss? By Tränings bim grosse FC Basel y dr U15 und U21 isch är ganz noch a dr grosse Karriere näbedüre gschrammt. Extrem schaad, ds Rüschtzüüg und dr Wiue wäre unzwyfuhaft vorhande gsy.

 

Zrugg zu de Wurzle

Wo dr Transfer nach Büre besieglet worde isch (Saison 2007/2008), het dr FCB y dr 3. Liga erschti Schtärkeklass gschuttet und isch ds Johr druf sogar y Zwöitliga regional ufgschtiege. Bis zur Saison 2013/2014 het me sech yr 2. Liga chönne behoupte, bevor e Abschtieg y die 4. Liga uf d'Saison 2016/2017 Tatsach worde isch und Büre chlyneri Brötli het müesse bache. Mittsdrin dr Mänu, meischtens im Schturm uf em lingge Flügu agierend und schpöter uf em Usebegg mit syne ungergässleche Schturmlöif für die erschti Mannschaft vo unersetzbarem Wärt. Bis zu sym Rücktritt us dr erschte Mannschaft ir Saison 2020/2021 hey d'Träner und d'Mitschpieler uf ne super Kolleg und bis y d'Hoorschpitze motivierte Manuel Scheidegger chönne zeue.

 

Während drei Saison (ab 2019/2020) het är sich näbem Schportleche ou im Vorschtand aus Juniorenobmann für e FCB schtarch gmacht und johrelang im KIFU verantwortlech gsy. Näbscht dene Angaschemaa het me u cha immer no by angere Aktivitäte uf e Mänu zeue.

 

Üs isch bekannt, dass dr Mänu syni Schuttschueh no nid furtgschosse het. Das lot Platz für Schpekulazione. Chunnt är no einisch, schtiegt är im Zwöi y, oder lot är's ganz lo sy. Eis isch klar, mit syre Yschtellig und schportleche Fitness wär e Rückkehr is Eis e Riesegwinn und für die jungi Egippe e zuesätzleche Motivationsschueb.

 

E Almdudler und e guete Bitz Fleisch mit Teigware und dr Mänu hesch im Sack. Nume dass de das ou no gseit isch.

​

Sportlechy Erfouge

Syni gröschte Erfouge bezeichnet är z'Erreiche vo dr 1. Cuprunde mit em FC Orpund gäge BSC YB (17.09.2005), wo mit 8:0 für e Oberklassig usgange isch. D'Ufschtiege mit em FCB 2008/2009 und 2018/2019. Und natürlich dr einzig Turniersieg "OLKA", wo är derby isch gsy.

 

Karriere aus Trainer

Dr Mänu het y sym Härz ou gäng Platz gha für d'Juniore. So isch är vo 2012 – 2019 Trainer gsy vo de Juniore F bis D. Syt dr Saison 2022/2023 angaschiert är sich bi de Juniore B vom Team Häftli (Safnern). Schnäu het är Akzeptanz gfunge, wüu sy Art mit Lüt umzgoh und die abwächsligsryche Tränings by de Jungs Aaklang gfunge hey. Aaschtand, Ehrgyz, Kommunikation und dr Teamgedanke sy ihm wichtig und das tuet är läbe und vermittle. Dr Mänu seit: "Ds Training muess zum Ziu ha, jede Schpieler wöue besser z'mache, damit d'Vorussetzige für ds Härefüehre a d'Aktivmannschafte cha gwährleischtet wärde".

 

Hobbys

Am Härze liege ihm dr FC Basel und dr SC Freiburg, drzeu ghöre natürlech die entschprächende Matschbsüech vor Ort, und ds Wandere y de Bärge isch für ihn d'Queue vor Inschpiration und Erholig pur.

 

Wenns scho mit em FCB (FC Basel) nid zum grosse Schritt glängt het, so hoffe mir doch Mänu, dass dr Schtartschuss für e erfougrychi Tränerkarriere mit üsem FCB chasch realisiere. Mir drücke beidi Düüme.

 

Mänu – es härzlechs merci für di feini Art und für dis Angaschemaa für üse FCB!

​

Erschienen im Matchprogramm vom 22. Oktober 2022