Fäbsi oder Fäbu (180 cm, 78 Kilo, blaui Ouge), isch y dr Saison 2018/19 zu Büre gschtosse, jo mi cha fasch säge gschtosse worde, und zwar nid dür ne Schpielervermittler oder wüu ne Büre umsverrecke het wöue, nei d'Liebi isch es gsy. Merci Lara Steiner, nid nume wägem Schutte exzellänt usegläse. Am 27. März 1998 in Bärn gebore und z'Ittige gwohnt bis är mit der Lara im 2019 y üsi Gägend zoge isch. Mit acht Johr het dr Fäbu dr Fuessbau entdeckt und churz drufabe dr Fuessbau ihn. Es Supertalänt (das het är de vo dr Mueter g'erbt, dr Vater isch nämlech Turner) mit de Schtatione SC Ittigen, Team Bern West und FC Köniz. Sy Wunschposition Stürmer cha är ds Büre nid gäng verkörpere, mou hängendi Spitze, mou Flügu. Aber so oder so immer e Unruheherd und e unbequeme Gägner. Schnäu, trickrych und mit em ne rächte Pfung vom ne Schuss usgschtattet.

 

Dr glehrt Lüftigsplaner und hütig Lüftungsmonteur liebt Pizza und Rahmschnitzu, was für ne Gägesatz, trinkt gärn Gaffee und Coca und y Sache Musig muess Hip-Hop zum Lutsprächer ustöne . D'Hobbys sy Fuessbau (das verblüfft nid), American Football und z'zämesyy mit de Fründe. I love Gareth Bale und aus Bärnergiu BSC YB und de no Tottenham Hotspur.

 

Dr Fäbu isch loyal und ehrlich und e ganz gmögige Bitz Mönsch. Dä muesch drüü Mou is Füdle schtüpfe, bevor dä es chlyses Gümpli nimmt. D'Rueh in Pärson. Do passt bim Ritual vor em Matsch ds Uspfuuse ganz guet drzue. A Büre maa är bsunders d'Kameradschaft und by "was ich schon lange sagen wollte" seit är "Merci, dass dr FC dr Günä (Marco Günther) u mi so guet ufgno het. Typisch Fäbu ! Fäbu – mir so froh bisch du by üs, gottefroh. Die grösste kleine Freude des Alltags: Kaffeepausen! Das isch ganz e glungige Cheib!

​

​

​

​

​